အိပ်မက်လေးသို့ အမှာစကား

အိပ်မက်လေးရေ

ကောင်းကင်ကို မော့ကြည့်ပြီး

ကြယ်တစုံလောက် လိုချင်တယ်လို့

ငါ့ကို မပူဆာပါနဲ့ဟာ

ကောင်းကင်ကို လှေကားထောင်ပြီး

တက်ယူပေးမယ်လို့လဲ

နင်ပျော်အောင် အလိမ်အညာတွေမသုံးချင်ဘူး

နင်လိုချင်ရင် ကြယ်တစ်စုံအစား

လိုရာသုံးဖို့ ငါ့ရင်တစ်စုံကို

နင်မတောင်းလဲ ပေးပြီးသားပါ ။

အိပ်မက်လေးရေ

ကန္တရလမ်း ခရီကြမ်းက

ထွက်သည့်ရေကြည်

အိုအေစစ်မှ သောက်ချင်တယ်လို့

မတောင်းတပါနဲ့လား

ခရီးကကြမ်း နင်ပန်းမှာမို့

သစ္စာကွင်းပြင်က

ငါ့ရဲ့ မေတ္တာရေကြည်လေးသာ

ဘ၀တသက်တာအတွက် သောက်သုံးပါလားကွယ် ။

အိပ်မက်လေးရေ

စိန်စီတဲ့လမ်း ရတနာပန်းနဲ့

ခြွေရံတစ်သောင်း

နင်တောင်းတလဲ

ဘ၀အခြေအနေ မရေရာသေးလို့

လက်ရှိဘ၀မှာတော့

နှလုံးသားကို ခင်း

သည်းဦးပန်းနဲ့

ငါ့ချစ်ခြင်းတွေကို

နင့်ဘေးမှာထား ခစားစေပြီး

နင့်ရဲ့ဘ၀ ထာဝရပြည့်စုံခြင်းနဲ့

ထားပေးပါ့မယ်

အိပ်မက်လေးရယ် ။

အိပ်မက်လေးသို့ အမှတ်တရ

                                                             လွင်ပြင်လှိုင်းငယ်